失敗乃成功之母！雖然紐卡素上周喺英聯盃被破今季不敗身，但領隊柏杜話呢場失利反而激起球員鬥志，加上今晚英超作客史篤城有「雙泰萊」復出，朱楓認為「喜鵲」有本錢反彈，開1.73倍「讓客」！（有線200及300、廣東體育周二凌晨4:00直播）
紐卡素幾日前喺英聯盃16強作客布力般，雖然喺法定時間逼和對手2:2，惜最後加時都輸3:4出局，被破今季不敗金身，不過領隊柏杜賽後就話呢場輸波反而令球員知道自己嘅不足，有信心「喜鵲」今晚對史篤城可以重返勝軌。
足智彩英超雙料「盤王」
其實紐卡素今季表現咁好，全賴一班球員夠搏命，每次落後或者處於下風都冇放棄，就係呢份不死決心，令「喜鵲」目前喺足智彩嘅「讓球」同「讓球主客和」都係「盤王」，預計今場有爆鼻嘅史提芬泰萊戴面罩復出，兼有左閘賴恩泰萊、中場迪奧迪同前鋒貝斯四大主力重披戰袍，應該至少可以延續聯賽不敗佳績。
史篤城兼顧歐霸盃謝晒
對家史篤城上周中亦有出戰英聯盃，結果喺先入一球下，最後以1:2不敵利物浦出局，連埋上輪英超輸畀阿仙奴，已錄得兩連敗，但朱楓覺得一啲都唔意外，事關史篤城早喺7月尾就開始踢歐霸盃，開季至今已打咗18場賽事，嚟緊周中又要作客以色列鬥特拉維夫馬卡比，對於史篤城呢支中型班嚟講，可謂一個沉重嘅負擔，賽前有報道仲指領隊佩尼斯今場打算搵「藥煲」活基治擔正倒戈，隨時成為今場勝負關鍵都未定！更多赛事信息
