重奪失落咗12年嘅聯賽冠軍，希爾星堡下一個目標就係瑞典盃！呢支瑞超班霸今晚主場出擊，博過檔嘅弗爆球星辛甸實唔會放過復仇機會，實行射爆艾夫斯堡爭入瑞典盃4強，希爾星堡小讓平半當然捧上盤。（開賽時間：周五凌晨3:00）
艾夫斯堡近5仗4敗
上仗擊敗加爾斯之後，希爾星堡提前3輪喺聯賽封王，家陣當然可以集中火力搶埋瑞典盃。希爾星堡今季表現咁好，陣中唔少球員都被撬走，繼根特過檔烏德勒支後，就連中場辛甸都話想喺退役前去歐洲大球會搵食，呢位瑞典老將連續3仗有波入，今晚肯定會繼續博表現望得到歐洲球探垂青。
對家艾夫斯堡早前曾經喺聯賽砌低希爾星堡，不過佢哋想重溫好夢唔容易，始終班波狀態麻麻，最近5場波輸咗4場，對上3次造訪希爾星堡亦輸晒，往績同近況都冇優勢，真係睇唔出憑咩同希爾星堡鍊。
