今季三支英超升班球隊當中，目前成績最好係昆士柏流浪，今晚佢哋主場迎戰阿士東維拉，贏面好大！事關麥利殊帶領嘅維拉戰術單調、踢法沉悶冇料到，反而有祖爾巴頓同胡禮仔坐鎮嘅昆士柏，實力連升幾個呢之餘仲夠晒激情，阿占撐昆士柏2.15倍主勝！（有線200、300及廣東體育周日晚11:00直播）
仲記得第一輪英超，昆士柏流浪喺主場慘吞保頓4蛋之後，有位朋友話今季三支升班球隊冇隊掂，但踢到依家第五輪，相信我呢位朋友都應該已經改觀，因為起碼仲有隊昆士柏流浪交到貨！昆士柏自從買咗快翼胡禮菲臘斯同麻煩友祖爾巴頓後，整體演出一場比一場進步，上仗更加作客贏埋狼隊，領隊禾諾克都應該好滿意。
維拉悶波5戰和4鋪
係，雖然祖爾巴頓係超級麻煩友，但講用波、傳送同閱讀球賽能力，佢真係堅抵讚，加埋佢嘅激情帶動到班隊友，難怪禾諾克錫到佢燶，仲畀埋隊長佢做啦！中場校炮靠祖爾巴頓，昆士柏側擊重任就落喺胡禮菲臘斯身上，難得佢之前冇畀曼城雪到硬晒，一過到嚟就交出應有水準，配合杜迪利甘保同保夫萊特，鋒力有一定保證o架。
對家維拉開季表現唔曳，麥利殊成功將套穩守悶功由伯明翰複製去維拉，係就係功勞唔細，但對球迷嚟講，就真係悶到爆囉！維拉開季5場不敗好似好威，其實只係1勝4和，作客撞正當打嘅昆士柏流浪，受讓平半都制唔過
