萬眾矚目嘅歐聯尋晚已經開波，最受球迷歡迎嘅曼聯毫無疑問係奪標熱門，不過紅魔鬼今晚喺C組作客賓菲加，阿占就推介「讓球主勝」，畢竟老謀深算嘅費格遜對歐聯太有把握，今仗又唔係非勝不可，隨時勒住慢慢玩！（有線61及201周四凌晨2:45直播）
曼聯歐戰經驗太豐富，面對非生死戰嘅分組賽場合，往往以唔輸行先，由於同組嘅巴素利同加拉治實力太差，紅魔晉級完全冇難度，今場作客賓菲加已經係最難踢嘅一仗，考慮到曼聯嚟緊周日仲要大戰車路士，加上中堅里奧費迪南冇隨隊，和波費Sir都已經收貨。
賓菲加面對勁旅唔輸蝕
紅魔除咗有後顧之憂外，賓菲加本身亦非泛泛之輩，佢哋喺外圍賽先後贏過特拉布宗同川迪兩支實力唔錯嘅球隊，季前熱身賽亦喺主場贏過阿仙奴同巴黎聖日耳門，可見佢哋同歐洲頂級球隊交手並唔輸蝕。
睇番賓菲加個陣容其實都唔曳，前線除咗沙維奧拿、奧斯卡卡度素呢對孖寶外，西班牙新星洛迪高摩連奴都唔簡單，佢喺上星期國際賽幫西班牙U21狂入三球，狀態同信心都返晒嚟。
