上季3冠王波圖今晚葡超力爭3連勝,可惜缺少咗為國征戰嘅尖刀侯克,想作客大勝利亞拿似乎唔易,一於冷敲3.65倍「讓球和」。(開賽時間:周三凌晨3:15)
波圖自從喺歐超盃輸畀巴塞隆拿後就一直冇比賽,今晚返到國內聯賽,當然想爭取聯賽3連勝一吐烏氣兼重返榜首。前排喺轉會市場成為車路士挖角對象嘅艾華路佩雷拉,最終都走唔成繼續留效,教練域陀佩雷拉就聲稱話呢位烏拉圭守將冇諗過走,希望穩定軍心:「佢非常之專業,依家亦好積極練波,好想幫我哋奪冠!」
利亞拿以守為攻
不過,波圖後衞沙普拿路同前鋒侯克分別被徵召入羅馬尼亞、巴西國家隊,今仗難以上陣,其中侯克自法卡奧離隊後成為前線支柱,今季2場聯賽攻入3球,今次缺陣對波圖火力影響頗大。
至於利亞拿雖然開季2場聯賽全敗,但都係僅以1:2落敗,論實力未至於唔夠班。值得一提,主隊前鋒達馬仙奴上場領紅,今仗需要停賽,其位置會由路爾斯利爾頂上,但對於主守嘅利亞拿嚟講影響唔大。