今晚繼續係國際賽日，葡萄牙U21喺主場迎戰法國U21，兩隊日前都喺U21歐國盃外圍賽贏波，走勢凌厲，大家防守都咁穩健，硬碰硬一於要1.62倍入球細。（有線155周二凌晨4:15直播）
葡U21近6戰5場開入球細
葡萄牙上場憑比拉馬後衞祖奧彭利拿，以及愛斯賓奴前鋒雷爾方素於下半場各建一功，擊敗咗摩爾多瓦。睇埋近績，葡萄牙已連續8場不敗，平均每場都失唔夠1球，近6場更有5場開細，追多次冇蝕底。
對手法國日前亦喺U21歐國盃外圍賽旗開得勝，以3:0大勝拉脫維亞，不過羅連安特中場艾列同蒙彼利埃前鋒科迪蓋達雙雙退隊，入波就惟有靠晒阿仙奴棄將、今季轉投羅連安特嘅前鋒基利斯辛奴。再睇埋近績，法國同葡萄牙一樣都係以穩健防守見稱，近4場有3場0失球，同時亦有3場開入球細，咁好路數梗係要細波啦！
