上星期推介京都不死鳥W中咗,今個禮拜再追佢哋,呢次京都作客札幌岡薩多受讓平半,下盤完全博得過,事關札幌去親函館千代台公園田徑運動場打波就唔識行,可以話同跌落個黑洞冇分別。(開賽時間:周日中午12:00)
不死鳥客W偏熱
札幌一共有4個主場可以用,函館嗰個係用量最少嘅,呢幾年都係每年一劑,不過07年起4次响呢個場打波,札幌居然未贏過,仲試過輸埋畀草津溫泉添。最頂癮係咁多年嚟,札幌响7至8月份主場對京都從未W過,04年嗰年仲係响函館淨吞對手兩蛋添,認真邪到痹。
由足智彩個主客和去睇,札幌主W雖然熱,但低唔過個平均值,反而和波、客勝都比外面啲博彩公司要低,其中個2.78倍客勝幾乎係最低嘅一個。咁又難怪,札幌今場除要入黑洞,10號仔宮澤裕樹又要停賽,芳賀博信養傷,京都受讓值博。