德甲新球季踢咗兩輪，升班球隊哈化柏林雖然只得1分，不過佢哋畀阿占嘅感覺係有一定實力，尤其攻擊線上有唔少好波之人，今晚作客漢諾威，牌面睇嚟輸蝕，但趁住對手要分心歐霸盃變成疲兵，哈化有一定偷雞機會，1.72倍「讓客」有得諗。（有線61、64、201及204周日晚11:30直播）
哈化柏林開鑼戰輸波後，上場即刻改變戰術轉打進攻足球，儘管最終都係贏唔到漢堡，但全場多次中柱又中楣只係略欠運氣，當中巴西10號仔拉菲爾基達奴重新擔正，拍住勁扭得嘅哥倫比亞前鋒阿祖安拉莫斯以及土耳其射手端尼杜倫，呢個進攻鐵三角亦擦出火花光芒四射。阿占認為呢種進攻踢法好適合哈化柏林隊波，依家搵啱門路，未來成績一定會愈踢愈好。
漢諾威踢歐霸未回氣
漢諾威開咧後兩連勝，球員狀態同士氣都好好，可惜太過依賴一批正選主力，板櫈深度又略嫌不足，最慘係班波剛喺歐霸盃惡戰完西維爾，班球星條氣都未回得切又要踢聯賽，表現點都會大打折扣，何況利安安達臣、卡列圖斯同新加盟前鋒艾杜亞蘇比治都養緊傷，今場就算有地利，要贏波都唔係咁易！
