倫敦暴亂不但未有停止迹象,更有蔓延至其他地區嘅趨勢,除周中國際熱身賽英格蘭對荷蘭及多場英格蘭聯賽盃首圈賽事取消,周六舉行嘅英超開鑼戰亦可能受到影響,其中以熱刺主場對愛華頓首當其衝,因為熱刺主場白鹿徑球場距離暴亂地點最近,為免大眾安全受到威脅,可能被迫延期舉行。
首周英超共有三場賽事於倫敦上演,包括熱刺主場對愛華頓、富咸主場對阿士東維拉及升班馬昆士柏流浪主場對保頓,由於三場賽事都喺當地下午3時開賽(香港周六晚10時),倫敦警方擔心到時未必有足夠警力,確保球賽安全舉行,故考慮將賽事押後舉行。至於其餘兩支倫敦球會車路士及阿仙奴首周作客,應該唔會受到影響。
賽會今開緊急會議應對
英超賽會將於今日召開緊急會議,決定首周賽事是否如期舉行,另外亦會關注其他城市情況,但熱刺主將雲達華治承認情況唔樂觀:「我從電視新聞睇到倫敦嘅情況相當混亂,我當然希望首周賽事如期開鑼,但亦要考慮安全問題。」
另一位熱刺球員伊高圖則表示,若開鑼戰延期舉行嘅話,會令之後嘅賽期相當緊迫:「我哋之後要應付歐霸盃賽事,如果仲要踢補賽,肯定會好忙!」