德國前鋒卡卡奧係今場大戰主角,事關佢將有望倒戈對祖國巴西,而且賽事喺史特加主場舉行,自己係名副其實主人家,所以佢充滿信心可以入波攞威,於是自掏腰包,買咗六十張門票請親戚朋友入場為佢打氣。
現年三十歲嘅卡卡奧由於多年來未獲巴西垂青,於兩年前決定代表德國,並有份參加上年世界盃。卡卡奧喺五月接受鼠蹊手術後已擺脫傷患困擾,並於上仗德甲開鑼戰射入一球,助史特加主場大勝史浩克04三比○,佢話要射破巴西大門,絕對唔係癡人說夢。
巴西「以德制德」
巴西亦實行「以德制德」,領隊文奴文尼斯徵召兩德甲兵作盲公竹,分別係拜仁慕尼黑中場路爾斯古斯達禾及利華古遜中場連拿度奧古士圖,其中前者將一圓已故媽媽對佢嘅寄望。