上季慘食白果嘅班霸拜仁慕尼黑,今季痛定思痛,今夏豪使逾四千萬歐元擴軍,其實拜仁實力本身就大超班,如今整體實力進一步精益求精,其餘球隊更難望其項背,難怪陣中多名主力球員包括拿姆同舒韋恩史迪加都豪言,對聯賽冠軍志在必得。
換帥增兵實力大幅提升
拜仁上季失敗,主要原因係畀混帳教頭尹戈爾搞衰,不斷將陣中主力放走同投閒置散,排陣又經常楚材晉用,其實只要將適合嘅球員放喺適合位置,拜仁喺德甲已經難尋敵手,今季佢哋搵咗經驗豐富嘅軒歷基斯第三度領軍,用人方面絕對唔成問題,何況佢哋上季防線脆弱問題亦透過增兵作出大改善,新加盟嘅紐亞、拿菲爾同謝路美保定都有相當級數,尤其紐亞更係目前歐洲其中一位最佳門將,絕對可以解決球隊後顧之憂。
拜仁最大殺着始終係一雙魔翼列貝利同洛賓,只要兩人今季健康良好,拜仁要喺多蒙特手上搶番聯賽冠軍唔成問題,至於能否進一步挑戰歐聯冠軍寶座,就要睇際遇啦!