在德國舉行的女子世界盃今夜上演D組分組賽，巴西女足鬥澳洲女足。本屆賽事各隊實力平均，巴西縱有「女球王」瑪達在陣，姬絲蒂安妮亦射術精湛，但「亞洲冠軍」澳洲實力唔曳，近期熱身賽鬥「硬嘢」士哥頻頻，巴西主W熱到1.3倍捧唔過，吼大盤！ （有線64台周四凌晨零時15分直播）
巴西近十年進身世界勁旅之列，上屆世界盃殺入決賽僅負德國，而且連續兩屆奪得奧運銀牌，今屆被捧為三大爭標熱門之一。事實上，前鋒瑪達近年盡擸國際個人獎項，實力毋庸置疑，另一射手姬絲蒂安妮亦強勢崛起，巴西去年七戰七勝於美洲國家盃稱后，二人就合力攻入十七球，攻力信得過。
巴西名氣大亦有巨星助陣，但睇番本屆賽事戰情緊湊，就算超班嘅德國亦只僅勝加拿大二比一，故巴西今場明顯讓多咗，1.3倍贏波賠率冇肉食，「讓球主勝」亦風險高。
澳洲遇強唔會縮
澳洲近年愈踢愈好，去年於亞洲盃曾擊敗日本，決賽對北韓更射贏十二碼捧盃。近一年「袋鼠女」於熱身賽鬥德國、新西蘭、墨西哥同英格蘭四支決賽周隊伍場場都入到波，今場唔係冇得踢，大盤1.5倍咪嫌少。
澳洲後衞艾莉絲佩莉
Ellyse Perry
位置：後衞 球衣號碼：6
年齡：20 星座：天蠍座
艾莉絲佩莉同香港好有緣，○七年十六歲時首次代表澳洲上陣，就係奧運外圍賽對香港，比賽地方喺港會場，當時佢入一球協助澳洲大勝八比一。艾莉絲佩莉多才多藝，本身同時亦係澳洲板球國家隊成員 ，○七年為板球隊正式上陣，成為國家隊最年輕板球員。
