今屆女子世盃嘅焦點係美國、巴西同衞冕嘅德國，不過亨格比利就對挪威非常關注。事關呢支傳統勁旅向來係女子世盃常客，今屆外圍賽晉級戰績更加係冇得頂，今晚喺D組對住世盃新丁赤道畿內亞當然可以秤先，「-2」都可放心捧「讓球主勝」。（有線64周三晚9:00直播）
赤道畿內亞疑似男人落選
近年挪威女足冇晒霸氣，主要原因係國家隊曾經爆出將帥不和，出現球員拒絕為國披甲嘅情況，好在自從09年由蘭森上任後一直順風順水，今屆世盃外圍賽更錄得7勝1和攻入39球佳績，個勢咁猛，極有希望藉今次賽事省靚招牌。
挪威女足自91世盃開始屆屆都有出席，95年奪冠之餘仲次次起碼打入8強。反觀今仗對手赤道畿內亞雖然係非洲新勢力，奈何只係首次出戰世盃，大賽經驗不足已經輸蝕，最弊係佢哋奪得2010年女子非國盃亞軍之後，被尼日利亞、加納同南非告上非洲足總，指辛寶莉姊妹原來係男人，呢對主將今次落選大軍，進一步削弱國家隊戰鬥力，對住挪威想輸少球都難！
