巴塞上仗作客皇馬咁多不利條件都唔輸，今勻風水輪流轉，之前所有「陷阱」變晒巴塞優勢，據聞決賽場地嘅草係至理想嘅2.5厘米，加上落雨會有少少濕滑，啱晒球隊快速入滲踢法，再加埋個「福星球證」主吹，巴塞想唔贏都難！
莫連奴將巴拿貝嘅草養到比平時長，目的係減低巴塞進攻速度，不過舉行今次決賽嘅米斯泰拿球場，主管就話會令草地以最佳狀態出賽，包括每日2次修剪，保持2.5厘米嘅最理想長度，足足比皇馬個場短5毫米，《西班牙體育報》更大讚球場「靚到可以打高爾夫球！」
除咗草長適中，華倫西亞氣象部門預測比賽期間9成會落雨，濕潤草地進一步加快球速，就算冇落雨，賽前10分鐘球場都會灑一次水，保證草地質素！天時、地利都有齊，加埋球證安迪安奴執法就有埋人和，呢位名牌判官歷來4次執法「國家打吡」，巴塞一共3勝1和未輸過，直頭係福星啦！
