南美自由盃分組賽尾聲,投注前最緊要睇清楚出線形勢,F組威斯特曼主場對查古里斯,值得留意,主隊實力差兼已出局,球員難免無心戀戰。反觀墨西哥球隊查古里斯今仗贏波即可以出線,爭勝心肯定比對手強,客勝值博。(周三早上7時15分開賽)
F組最後一輪兩場比賽同時舉行,查古里斯目標鮮明,總之贏波就可以打入十六強,毋須理會同組國際體育會主場對艾美歷克嘅賽果。呢種形勢,查古里斯戰意當然有保證,對佢哋最有利地方,係對手玻利維亞球隊威斯特曼已出局,相信唔會壞佢哋大事。事實上,威斯特曼根本未夠班喺自由盃立足,五場分組賽只得一和四負,想阻查古里斯亦有心無力。
至於國體會主場對艾美歷克,基本上兩隊只能活一隊,巴西勁旅國體會和波都可以出線,但畢竟主場出擊,應會以三分為目標,爭取首名出線。基於查古里斯好大機會有分落袋,排第三位嘅厄瓜多爾球隊艾美歷克實在冇得選擇,惟有焗攻博出線,今場最好博入球大。