蘇超進入倒數階段,今晚獨腳戲由榜首格拉斯哥流浪作客登地聯,流浪挾4連勝強勢之餘,更有射手賴史密夫刑滿復出,相信可以大勝為嚟緊場榜首大戰壯行色,要2.7倍「讓球客勝」。(now638台周三凌晨2:45直播)
流浪錄得聯賽4連勝,現暫以1分領先些路迪,不過就比對方踢多一場,流浪為保爭標希望,剩低6輪聯賽都會搏老命,尤其係佢哋4日後會迎戰些路迪,今戰肯定想攞3分以免夜長夢多。事實上,流浪搶W係有心有力,事關佢哋除咗近8戰場場有士哥,上輪停賽嘅次席射手賴史密夫今仗又刑滿復出,火力相當靠得住。
對家登地聯依家排喺聯賽第4位,落後3哥赫斯9分但踢少場,雖然數字上仲有機會爭歐霸盃入場券,但教練彼德侯斯頓一早打定輸數,承認呢個係不可能嘅任務。咁又係嘅,登地聯條防線一向穿窿,近4仗夾埋失咗7球,今仗又話有守將戴倫杜特斯因傷缺陣,點頂得住蘇超入波王流浪吖?