今晚瑞超上演「雙堡」大戰,希爾星堡於主場迎戰艾夫斯堡,兩軍同樣喺上周開咧戰贏波,然而艾堡今仗有後防主力受傷缺陣,寧捧希堡1.95倍主W仲好。(開賽時間:周日晚上10:30)
艾夫斯堡兩將打柴
爭標熱門希爾星堡上場以3箭頭陣式出戰,根特、辛甸同拉斯梅斯莊臣拍住上攻堅,效果甚佳,預料經過一場磨合,今仗默契會進一步提升。睇番希堡近3季喺主場迎戰艾夫斯堡,錄得2勝1和,今仗勢必再藉主場優勢再下一城。
艾夫斯堡上場雖然贏波,卻告損兵折將,主力中堅鍾莊臣膝傷退下火線,正選中場安達斯史雲遜亦因傷,上仗提早被調離場,今仗肯定雙雙缺陣。事實上,艾堡上季兩次喺聯賽同希堡對碰皆輸,夾埋失咗5球,加上兩軍近5次對賽有4次由主場一方勝出,今晚艾堡殘陣作客,睇怕凶多吉少。