踢波除咗講實力之外，信心都好緊要，如果你心不在焉、諸多顧忌，又點會踢到好波？大家都係踢十一個，對手實力就算弱啲，但一樣有手有腳，嗰啲所謂強隊根本揀唔過。熱刺本季兼顧兩條戰線，歐聯殺入八強影響英超表現，已經連續四場聯賽贏唔到，仲要剛被皇馬大炒四粒，球員心情沉重，主場對史篤城難勝。 （有線303及203台周六晚10時直播）
歐聯慘敗冇晒心機
老實講，熱刺本季其實表現唔曳，依家仲排緊聯賽第五位，而歐聯更打到入八強，領隊夏利列納同一班球員都有良好演出。周中熱刺作客巴拿貝，射手高治老早領紅令球隊更加唔夠踢，最後慘吞四蛋，對佢哋打擊極大，下周中踢次回合，尚且未知用乜心情去應付，今晚一場聯賽更加惡搞，班球員分分鐘遊魂。
熱刺近期於英超跌Watt，對韋根、韋斯咸、狼隊都贏唔到，仲輸埋畀黑池，今晚鬥硬淨史篤城難搞。
史篤城有姿勢有實際，球隊踢法機動，上仗鬥車路士都唔使輸，多名戰將表現一流，中堅賀夫更能攻善守，而前鋒約拿芬禾達斯更連續兩場有波入，球隊狀態明顯正在冒升。熱刺依家兩頭唔到岸，未能全心全意投入比賽，讓波咪搞，捧「讓球客勝」。
