周六凌晨德甲獨腳戲，法蘭克福主場對雲達不來梅，兩軍近期都積極搶分爭取護級，表面上雙方成績都有改善，但法蘭克福所遇對手皆屬平庸之輩，反觀不來梅屢鬥強敵，戰績更具說服力，加上射手比沙路坐完波監強勢復出，不來梅作客讓平半照捧場。 （有線61及202台周六凌晨２時30分直播）
不來梅雖然今季成績大倒退，但畢竟根基較深厚，由於傳統大球會較具榮辱感，往往可以喺危急關頭逼出潛能，好似史浩克04及史特加今季聯賽演出同樣唔掂，但近月已恢復水準。不來梅情況亦相似，佢哋近八場聯賽僅輸畀漢堡，面對緬恩斯、漢諾威、利華古遜及紐倫堡等前列球隊都搶到分，絕對不能小覷。
達姆未執掂法蘭克福
而且不來梅近期作客表現比主場更醒神，作客取得兩連勝，加上射手比沙路坐完波監，人腳更加齊整，勝算進一步提升。
法蘭克蘭方面，近兩仗取得四分，但只係贏尾二聖保利及上仗打和尾三禾夫斯堡，整體演出仍未盡人意，特別係上仗由新教練達姆帶領下，即使先打開紀錄，其後打多一人都未能全取三分，可見球隊仲有排執，今晚主場都冇着數。
