賓菲加左閘法比奧干查奧近期受到多支英超大球會垂青,但由於種種原因,呢位葡萄牙球員嘅目的地極有可能唔係英格蘭,而係以天價轉投德甲班霸拜仁慕尼黑!
矜貴左閘標價2.53億
現役有質素嘅左閘球員買少見少,令到法比奧干查奧非常吃香,引嚟利物浦、車路士同曼聯爭相搶購呢位23歲明日之星。有見及此,賓菲加同1月出售大衞雷斯時一樣,將法比奧干查奧吊高嚟賣,標價2,000萬鎊(約2.53億港元),即時令財困嘅利物浦卻步。
至於曼聯同車路士,都同樣成功留住陣中正選左閘,變咗再冇簽入法比奧干查奧嘅需要。據《每日郵報》最新消息,喺1月收購愛華頓左閘巴尼斯失敗嘅拜仁慕尼黑,已經向法比奧干查奧埋手。由於拜仁左閘位置極需要一位有質素嘅球員,會方大有可能接受2,000萬鎊嘅標價,另加一份豐厚嘅5年合約利誘法比奧干查奧。