葡超勢力席捲歐霸盃！嚟到8強大戰，葡超球隊就佔咗當中3個位置，啱啱爭輸咗個聯賽冠軍嘅賓菲加，今晚就要喺首回合同荷甲勁旅燕豪芬合演一場「阿二大戰」。賓菲加雖然有主場之利，但想省靚葡超招牌絕對唔易，事關佢哋防線近排演出衰到貼地，已經連續8仗有失波，前面入埋唔夠輸，要讓波我寧願捧2.25倍「讓球客勝」好過。（有線64及203周五凌晨3:05直播）
賓菲加上周末喺主場睇住宿敵波圖贏波捧走聯賽冠軍，球隊除咗輸3分只能屈居亞軍外，更重要係士氣都輸埋，畀人踩到上心口攞威。事實上，佢哋近排狀態的確唔算理想，連聯賽同歐霸盃計，近6戰只係得2勝2和2負，再睇埋防守數據，已經係連續8場有失波，合共失咗10球，嚟到歐霸盃呢個高水平舞台，真係唔多信得過囉。
賓菲加火力弱
前線方面，奧斯卡卡度素今季狀態明顯有多少回落，艾馬同沙維奧拿兩個阿根廷兵今屆賽事仲未入過波o架！至於話近況有多少回勇嘅老將紐奴高美斯，又話因左膝重創要提早收咧，爭勝武器買少見少。
燕豪芬托禾倫復出
燕豪芬呢邊，同樣上周末喺榜首大戰不敵川迪，喺荷甲跌番落老二之位，爭標形勢已經落入下風。不過點都好，呢班波勝在演出穩定，近11戰僅輸1場，如果單計作客波，仲要係12戰僅1負，之前喺歐霸盃作客格拉斯哥流浪、里爾同森多利亞都未輸過，今仗仲有射手托禾倫復出，要喺呢場98年歐聯決賽翻版保住唔輸，機會樂觀。
歐霸盃賽制
8強為主客兩回合制，今場為首回合賽事，若兩回合總比數打和，先計算作客入球，再和則在次回合90分鐘後，加時30分鐘，若雙方在加時取得相同數量入球，由作客球隊獲勝，若加時沒有入球，則互射12碼分勝負。
賓菲加場場有失波
‧歷來5次對碰得1勝3和1負。
‧近8戰得4勝2和2負，全部有失波。
燕豪芬11戰得1敗
‧近11戰僅逢1敗，有5戰冇失波。
‧今屆歐霸盃作客6戰得4勝1和1負。
