另一場八強首回合，基輔戴拿模主場迎戰葡超三哥布拉加，後者表面上係今屆八強三支葡超球隊之中，牌面最弱一隊，但勝在有自知之明，大踢擦鞋仔波，以穩守取勝，近三場歐霸盃都力保不失，今仗遠赴烏克蘭比賽，人生路不熟，更加會踢守勢波，基輔攻力一般，難以咬得入佢哋，博2.35倍「讓球客勝」。（有線63及204台周五凌晨3時05分直播）
紅軍都咬佢哋唔入
布拉加踢歐聯分組賽期間表現並非太差，六場都贏到三場，雖然最終出局，但亦吸取咗唔少寶貴經驗，學得更加謙卑，對轉戰歐霸盃大有幫助。布拉加上圈面對利物浦，表現明顯較成熟，特別係防守非常穩健，兩回合都「零封」對手。聯賽連盃賽，布拉加近八仗只失兩球，後防滴水不漏，等閒之輩，好難攻入佢哋大門。
至於基輔戴拿模雖然上圈淘汰曼城，但演出唔算太突出，尤其係次回合大部分時間踢多一人，都輸波收場，更令人質疑球隊鬥心。基輔仍然依賴老將舒夫真高數胡，但佢水準已無復當年勇，盲目信賴名將，只會拖累球隊進步。畢竟係首回合賽事，基輔亦唔敢太冒進，否則一旦被對手取得作客入球，晉級機會將大受削弱。相反，若然基輔今場打和○比○亦冇壞，次回合作客取得入波，隨時更着數，唔好高估主隊爭勝決心，更何況基輔近十次對葡萄牙球隊，只取得三勝七負，讓波有暗湧。
