南美自由盃聽朝續有好戲碼,天主教大學會喺全場爆滿嘅聖卡路士球場恭候沙士菲,進行分組賽D組賽事。只要天主教大學全取3分即可奠定16強席位,主場出擊加上有鋒將柏拉圖做「二五仔」,睇嚟沙士菲都係凶多吉少,天主教大學讓平半一於要上盤。(開賽時間:周五早上8:30)
天主教大學目前喺D組揸住7分,只要今仗贏波即可提早出線,戰意毋庸置疑。據當地《體育報》報道,聖卡路士球場嘅兩萬張波飛晨早售罄,有大批自己友到場打氣,天主教大學當然唔會令Fans失望啦!
沙士菲攻強守弱
佢哋嘅阿根廷射手柏拉圖曾効力小保加,對家鄉足球可謂瞭如指掌,賽前佢就做「二五仔」向隊友大爆沙士菲球員嘅弱點係前重後輕,似乎有晒對策收死對手。
作客嘅沙士菲尋日起程到智利,教練加里卡賽前表明會大打進攻足球,但亨格比利睇番新季阿甲戰績,沙士菲4場作客場場有失波,盲目搶攻隨時輸得更慘。何況一對中場孖寶包括法蘭高拉索迪同大衞拉美利斯因傷肯定缺陣,既然首循環主場都要輸畀天主教大學3:4,聽朝輸多鋪有乜出奇?