主場王嚟啦！今晚歐霸盃8強首回合維拉利爾主場對川迪，1.53倍主W唔怕熱捧！事關「黃色潛艇」今屆主場惡過鬼，撞正川迪主帥普荷美有「恐西症」，贏波「依絲執」啦！（有線1、61及201周五凌晨3:05直播）
川迪教頭有恐西症
因馬略卡出現財困，今季先有機會玩歐霸盃嘅維拉利爾，勢估唔到踢落咁Sharp醒，主場更加6戰全勝，射手基奧斯比羅斯暫時仲以8球排射手榜首位。再睇埋「黃色潛艇」目前喺西甲足足拋離第5位嘅畢爾包9分，前4位置好穩陣，你話維拉利爾今晚又點會唔出強陣、錯過打響頭炮嘅良機？
對家川迪啱啱喺荷甲勇挫燕豪芬升上榜首，賽後教練普荷美仲獲球會主席大讚係荷蘭雲格。不過普荷美似乎仲欠缺啲自信，賽前竟讚維拉利爾係「小巴塞隆拿」。鬼咩！呢位比利時一代鋼門原來有「恐西症」，無論做球員定教練、代表球會定國家隊，以往5次對住西班牙球隊竟然全敗，睇怕今晚就算有後防杜格拉斯法蘭高刑滿都凶多吉少
