今晚歐聯嘅英格蘭內訌預料會火藥味甚濃，兩軍領隊安察洛堤同費格遜亦敵亦友，雖然車路士近期死晒火，但喺對賽佔盡上風嘅肥安今場誓言再贏一仗，令自己逃離被炒嘅厄運。
對賽往績7勝2和3負
安帥同費Sir互相欣賞之餘，亦都非常老友，試過喺比賽後一齊飲酒談天。不過兩人去到足球場上當然冇情講，肥安喺初出道時執教祖雲達斯喺歐聯畀曼聯反勝淘汰，但之後佢率領AC米蘭就兩度淘汰費爵爺，嚟到車路士後更加贏過曼聯4次，僅僅輸過一次社區盾。
睇番兩人嘅對賽往績，安帥錄得7勝2和3負嘅優勢，難怪佢今仗賽前都表現得信心十足：「雖然車仔球員曾經喺歐聯決賽12碼射輸畀曼聯，但我同佢哋講依家只淨低450分鐘，就會贏得歐聯冠軍，所以點都要全力以赴，我有信心我哋會做到！」另外佢又提到想繼續留喺車仔，因為自己好鍾意一班球員，所以希望贏得歐聯保住帥位。
