費蘭度托利斯加盟車路士後，其實已經入咗好多球，不過全部都係操練時射入。門將施治透露呢位西班牙國腳操練時成日瘋狂入球，如果佢可以放鬆心情，一定可以喺正式比賽打破入球荒。
練習賽瘋狂入球
費托季中加盟車仔後一直食白果，被指可能會步球隊前射手舒夫真高後塵黯然離開，不過施治爆料指費托狀態相當弗，射術仍然精湛：「費蘭度托利斯經常喺操練時入波，絕對係一位高質素球員，比賽時亦經常為隊友製造機會，佢入唔到波只係運氣唔好，我肯定只要佢取得第一個入球，之後就會陸續有來。」
施治亦指費托加盟車路士之前已經有英超比賽經驗，情況同舒夫真高唔同，不能相提並論。照施治咁講，如果費托將今場歐聯對曼聯當係練習賽咁踢，似乎更大機會有「士哥」。
