可能系史上最重要、最贵嘅米兰打吡，今晚喺圣西路爆发！今仗唔止关乎面子，仲可能决定今季意甲冠军谁属，朱枫就睇好国米赢波，事关国米教练李安纳度上季同AC不欢而散，今晚首次倒戈，对住冇伊巴谦嘅AC，肯定搏命谂计复仇，平手盘捧1.9倍嘅国米！（now633、660台及中央5台周日凌晨2:45直播）
早喺一个礼拜前，意大利传媒已经狂煲呢场米兰打吡，皆因AC目前只系领先国米2分，而且两队经过歇冬增兵后，正选球员身价已升值至3亿欧元（约33亿港元），仲攞埋双方班主同教练做比较添。
国米4大Goal手落场
咁又系，AC自07年捧世界冠军球会杯后，就再冇捧过任何锦标，家阵难得有机会一搔4年之痒，梗会搏尽。不过对家国米亦要力争史无前例嘅6连霸，传媒力煲呢场波亦好正常。今战焦点，肯定系国米教练李安纳度，事关佢上季仲教紧AC，连埋做球员同经理，李帅足足效力咗“红黑兵团”13年。赛前李安纳度大爆上季尾之所以离开AC，全因同主席贝鲁斯干尼不和，今晚首次倒戈，仲唔有仇报仇咩？
阵容方面，国米后防卢斯奥停赛，但据报李帅已决定豁出去，一次过派柏仙尼、彭迪夫、伊度奥同史奈达踢丧攻四重奏，加上《慢镜头》又爆料，指“国米王子”迪亚高米列图已经伤愈，今场可以担任后备，就算国米嚟紧周中要出战欧联8强又使乜惊？
AC伊巴谦停赛状态曳
对家AC米兰自从喺欧联出局后，表现大跌Watt，上仗仲输埋畀巴勒莫，录得3战不胜。虽然AC赛前帮射手伊巴谦莫域上诉成功，由停赛3场减至2场，可惜今晚依然赶唔切上阵，需知AC首循环就系靠佢一箭定江山搞掂国米，今晚冇佢都咪话唔大镬！
AC近4战仅入2粒
‧近8场获4胜2和2负，对上4场加埋只入得2球。
‧近10次交手只得3胜7负。
国米作客胜率47%
‧联赛作客获7胜3和5负，胜率达47%。
‧近8场获6胜1和1负，有4场射入2球或以上。
