史浩克「鋼門」紐亞今季尾離隊可謂勢在必行,有傳球會已經開始搵替補人選,其中大熱係前阿仙奴門將曼寧加!
史浩克新帥蘭歷克,近日極力要求球會同隊長兼主力門將紐亞續約,可惜呢位目前德國一號門神去意已決。外間盛傳曼聯同拜仁慕尼黑都對佢起痰,但紐亞已表明無意轉戰海外:「我每年會出國兩次,就係冬天同夏天。我知好多人都想出國踢波,但我絕對唔認同。」
由於紐亞極大機會轉會拜仁,史浩克已積極搵代替人選。據意大利《都靈體育報》爆料,史浩克睇中祖雲達斯後備門將曼寧加。雖然呢位前阿仙奴門將今年已33歲,但勝在經驗豐富,加上識講德文,適應應該冇問題!