今晚德甲聖保利主場對史浩克04，雖然史浩克有歐聯後顧之憂，但諗番佢哋今場有新帥蘭歷克首度領軍，唔似會扯白旗，更何況聖保利嗰邊近排立立亂，史浩克小勝應該冇問題，2.02倍客W值博！（有線61及202、中央5台周六凌晨2:30直播）
雖然史浩克早前成功殺入歐聯8強，但最終都炒咗教練馬加夫，改由蘭歷克執教。蘭歷克曾經喺04-05年教過史浩克，而且表現唔錯，當年幫球隊成為德甲同德國盃嘅「雙料亞軍」，近年更幫賀芬咸成為神奇球隊，難得回巢，今晚處子登場當然要爭番口氣。
魯爾法芬表態留隊
雖然史浩克嚟緊周中要喺歐聯8強作客國際米蘭，射手亨特拉爾今晚又肯定倦勤，但好消息係魯爾同法芬兩大主力，近日都表態季後唔會離隊，可謂大大增強球隊士氣。
對家聖保利近況奇差，上場作客不敵法蘭克福1:2後，經已錄得5連敗，點知繼後再爆出連串負面消息，先有前鋒艾沙姆喺屋企玩3P斷正畀老婆，再有前阿仙奴右閘禾斯重傷提早收咧，教練史坦斯羅斯基日前更暗示今季後有意離隊，連阿頭都想跳船，你話班球員仲邊有心機踢波？
聖保利近5戰輸晒
‧近8場獲3勝5負，對上5場全部輸晒。
‧聯賽主場獲4勝3和7負，勝率僅29%，排德甲倒數第2。
史浩克少食白果
‧近8場獲3勝2和3負，只有2場冇波入。
‧近9次正式比賽交手，獲5勝3和1負
