兩年前先至勇奪德甲冠軍嘅禾夫斯堡,今時今日淪落到要喺護級邊緣徘徊,亨格比利睇死「狼堡」有排衰,今晚聯賽造訪主場硬淨嘅雲達不來梅,睇怕都難逃一敗,「讓主」有2.33倍博得過。(有線61及64周六晚10:30直播)
禾夫斯堡場均失兩球
「狼堡」近6場德甲有5場失分,教練馬加夫坦承仲未搵到最佳陣式同人腳,難怪今季已經用過29位球員。日本中場長谷部誠要停賽,日前祖殊又同具滋哲講手,近況、士氣同人腳都真係好麻麻。
對家雲達不來梅上仗雖然輸咗鑊勁嘅畀拜仁,好在佢哋主場表現不嬲對辦,今季德甲7戰就獲6勝1負佳績,當中秘魯射手比沙路足足轟入8球,有佢壓陣夥拍阿拿奧杜域攻堅,就算亨特要坐波監影響都唔大,火力都夠晒猛啦!況且「狼堡」今季場均失兩球,對上7場作客波又全部失分,今鋪都係等劏o架喇!