剛於歐聯出局嘅「紅魔鬼」曼聯,收拾心情今晚主場英超迎戰狼隊。曼聯陷入低潮已唔係近幾場嘅事,打從十月畀曼城大炒之後,多場賽事都有心無力,踢得相當辛苦,今仗面對踢法硬淨嘅狼隊,樂比仔捧細盤。(有線200台及300台周六晚11時直播)
樂比仔唔係馬後炮嘅人,季前已力數曼聯不足之處,但估唔到曼聯季初真係順成咁,不過花無百日紅,經過季初嘅蜜月期後,曼聯無論狀態、士氣都跌落谷底,加上受傷兵問題困擾,近五仗僅贏一仗,能否及時反彈,就要睇費爵爺嘅功力喇!
「小豌豆」養傷影響大
樂比仔簡單分析一下曼聯目前嘅問題,首先係傷兵多,尼曼查維迪、路爾斯安達臣、湯卡華利、奧雲、達施華兄弟及「小豌豆」查維亞靴南迪斯因傷缺陣,其中以「小豌豆」缺陣影響最大,因為自從朗尼陷入球荒之後,佢一直肩負起入球重任,即使早前受傷嘅貝碧托夫有機會復出,但狀態亦成疑。
另外一眾年輕球員嘅心理質素似乎唔夠強,踢順境波嘅時候也文也武,但一喺關鍵時刻卻冇貨交,好似韋碧克、艾舒利楊格、基斯史摩寧甚至馬捷達等人,似乎仲未有足夠準備接班。
不過,另一邊廂嘅狼隊作客經常腳軟,近五仗全敗,三個入球當中,有兩球來自十二碼,即使曼聯防線唔算穩健,但要保持清白之身相信唔難。由於兩隊都冇乜入波本錢,所以今場捧細係明智之選