洲際級球會最Top賽事世冠盃，今晚喺日本名古屋開打，柏雷素爾喺資格賽對奧克蘭，1.7倍「讓球主勝」抵玩。雖然東道主日職冠軍柏雷素爾首次參賽，但所謂大洋洲聯賽冠軍盃得主奧克蘭，只係半職業球隊，柏雷素爾今晚只要擊敗魚腩就有100萬美元（約780萬港元）獎金落袋，去邊度搵呀？（有線61及201周四晚6:45直播）
被稱為「雜草軍團」嘅柏雷素爾，可以話係近年最冇星味嘅日職冠軍，全隊連半個常規日本國腳都搵唔到，但教練尼仙奴化腐朽為神奇，帶領佢哋以升班球隊身份，創造歷史攞冠軍，除咗「司令塔」李安度杜明基斯當選日職MVP，佢隊友佐治韋拿、酒井宏樹同近藤直也都入選最佳11人陣容，表現令人激讚。
入4強有1560萬
根據賽制，資格賽晉級有100萬美元獎金，輸波得50萬美元落袋，而且柏雷素爾贏波嘅話，8強對手只係中北美洲冠軍蒙特雷，唔係冇得打，一個唔覺意入埋4強，就至少有200萬美元（約1,560萬港元）巨獎，話晒柏雷素爾喺日職過終點衝線前，近13場有11勝1和1負，打沉過川崎前鋒、名古屋鯨魚同鹿島鹿角，有錢搵肯定更醒神。
奧克蘭屬半職業
至於第3次出席世冠盃嘅奧克蘭，09年叫做贏過兩場得第5名，不過講到尾，佢哋只係新西蘭半職業球隊，陣中最多人留意係巴塞B隊出身嘅前鋒艾斯普薛圖同中場安德魯，前者仲要有傷唔知踢唔踢得，至於司職後衞嘅隊長維斯歷治係新西蘭國家隊出場次數最多球員，可惜最叻只係踢過洛達同華域克，咁嘅陣容，難怪佢話有準備首戰出局啦
