辛辛苦苦透过外围赛杀入分组赛,英超史笃城竟然因为嫌远,就宁愿喺今晚欧霸杯E组首场分组赛,选择半力出访乌克兰嘅基辅戴拿模。要知道基辅近排7连胜状态大勇,仲有把“生锈军刀”舒夫真高压阵,要屠城都绰绰有余啦!今场我捧1.72倍主胜。(有线64及204周五凌晨1:00直播)
史笃城作客嫌远半力出击
史笃城喺今届分组赛3场作客波要去匀乌克兰、土耳其同以色列,夹埋飞11,000哩,舟车劳顿影响唔细。虽则话佢哋今季表现神勇,欧霸杯连英超踢8场未输过,上周英超仲连利物浦都砌低埋,但就因为佢哋领队佩尼斯紧张英超成绩,唔想班波去完乌克兰,今个周日返嚟唔识赢新特兰,就宣布今次唔会夫添出征。
据知,新兵前锋高治同后防主力厄逊都有轻伤在身唔会去,新星门神比高域亦留喺英格兰,揾老将苏连逊顶上算数,再加上艾法宁顿同“手榴弹”专家戴纳都因伤唔踢得,反而上仗复出踢咗19分钟嘅柏拉西奥斯,就会作新季首次正选,摆明当为联赛热身。
基辅呢边,家阵喺乌超排第2,佢哋近排喺各项赛事攞到7连胜气势劲爆。阵容上,佢哋前场有经验老到嘅舒夫真高孭飞,中场又有巴西新星杜度派牌,要赢残阵嘅史笃城又有几难?