上星期嘅國際賽，香港最多粉絲嘅英格蘭雖然以三比○贏咗保加利亞，但下半場冇入波，好可能令玩即場嘅朋友損手噃！睇怕近期最正氣嘅都係德國及荷蘭喇！
呢兩隊我都會長跟，因為德國有好多優質年輕球員爭住上位，場場有表現亦都場場對辦。荷蘭亦一樣正氣，加上上個月歷史性取代西班牙成為世界第一，成為「橙汁兵團」往後比賽強大推動力。
外圍賽全開「半勝」
今晚荷蘭會喺歐洲國家盃E組外圍賽作客芬蘭，橙軍首循環主場贏二比一，相信會愈踢愈有勁，依家七場分組賽全勝排榜首，已經遙遙領先，但荷蘭嘅正氣風格話我知，今晚一於照贏可也！
佢哋呢七場除贏得精彩外，仲要全部半場領先，今晚揀個有1.85倍嘅「半場客勝」亦都唔錯，「讓球客勝」亦係心水之選。雖然雲達華治同洛賓都有傷唔在陣，但上場大炒聖馬力諾，箭頭有亨特拉爾，然後用古積特、史奈達同尹佩斯做進攻中場都唔錯吖！上場輕勝冇影響球員體力，反而仲增強今晚作客芬蘭嘅信心添！
講到芬蘭，我個腦就即刻彈出列馬倫同希比亞兩個名，不過除咗佢哋之外，芬蘭往後都好似冇乜新血可以喺國際球壇殺出血路，依家喺呢組七戰得九分，都係陪跑居多，陣中球員得科素叫做較有質素，但今晚想做救世主就仲未夠班囉！
