保地花高同明尼路兩支巴甲隊伍,聽朝展開兩星期內嘅第3次交鋒,喺南美球會盃第2圈次回合再續前緣。總比數落後緊1:2嘅明尼路攻不銳守不穩,今仗作客焗攻盞送死,寧吼保地花高個1.68倍主勝。(開賽時間:周三早上7:15)
明尼路21次對賽僅W一鋪
明尼路早排炒咗杜利華祖利亞,改由前高士路主帥古卡領軍,不過佢老人家仲未摸熟隊波,執掌4戰全敗,當中喺南球盃首回合同巴甲兩鬥保地花高都輸波,擺明冇保地花高符。睇番往績,雙方過去21次交手,明尼路只係贏過1次,今季喺巴甲入球率低不特止,場均仲失成兩球,聽朝即使有中堅利華漢拔圖刑滿復出,都唔似有本事可以扭轉敗局。
保地花高呢邊就唔同嘞,近8仗贏足6場,今戰除咗話有艾比奧克服膝傷復出之餘,佢嘅前線拍檔靴里拉亦都坐完波監,攻擊中場艾傑臣今季又已經有7球進帳,前線咁猛火,明尼路仲話要焗攻反撲喎,睇怕都係死路一條咯!(首回合保客勝2:1)