今夏大事擴軍嘅羅馬將迎來本季首場正式比賽,喺歐霸盃作客斯洛伐克「一哥」施洛雲,「雌狼」一眾新兵仲未磨合完成,而且助教迪拉彭拿又突然陣前離隊,嚴重打擊士氣,寧捧2.05倍「讓主」。(開賽時間:周五凌晨2:45)
施洛雲贏狀態默契
羅馬今季由前巴塞B隊教練安歷基接掌後,陣容出現極大變動,一對箭頭文尼斯同胡仙歷雙雙被踢走,換嚟巴塞新星保贊夥拍波里路,另外又簽入荷蘭門將史基倫堡同左閘荷西安祖。不過,羅馬呢個夏天只係踢咗3場熱身賽,班波明顯仲未夾熟,上場遇上實力分子華倫西亞即吞3蛋,實在好難靠得住。最慘係助教迪拉彭拿日前突以私人理由辭職,對軍心構成一定影響,加上喺世青盃踢到曉飛嘅阿根廷中場拉美拿,又獲准放假延遲歸隊,而迪羅斯又要停賽,令中場實力大減。
另邊廂嘅施洛雲早前喺歐聯出局,以致要降格踢歐霸盃,不過佢哋隨即喺國內聯賽反彈取得2連勝。更重要係斯洛伐克聯賽正值季中,一班球員狀態同默契肯定比羅馬好,想喺主場保持不敗相信並非難事。