首天吞車仔四蛋嘅傑志，季軍戰對布力般流浪，傑志要爭取入波，避免成為賽事歷來首支兩場都吞蛋嘅主隊。（有線201及301台周六晚6時直播）
由於兩軍實力有明顯差距，加上各支英超球隊都以主力參賽，所以過去幾屆主隊都冇運行，只得○五年泰國憑互射十二碼偷雞贏過波，其餘都係輸波收場。南華四年前代表香港參賽亦係兩戰皆北，但就有李海強同埋巴路士分別射破利物浦及富咸大門，加上以往從未試過有主隊兩場都吞蛋咁羞家，難怪傑志教練甘巴爾喺記者會上承認今晚有壓力：「我知道好多球迷都想見到傑志入球，我哋都好想完成大家心願，只不過香港聯賽水平同英超比實在係有好大距離，坦白講我哋只可以盡力而為。」
盧均宜朱兆基歸隊
傑志隊長盧均宜及朱兆基兩位主力完成港隊使命後歸隊，今仗終可夫添出陣。首天對車仔踢咗十六分鐘，周四對沙特阿拉伯又踢足全場嘅「均宜」有信心及時回氣：「我唔係覺得好攰，只要教練畀我踢，絕對冇問題。不過球隊開操後我只係返嚟操咗兩課，同班新隊友仲未係好夾。」港隊兩戰沙特吞八隻蛋，加埋傑志上仗輸○比四，「均宜」承認呢幾場戰果對香港足球的確係有負面影響，唯一補救辦法就係對布力般打番場爭氣波，為自己同埋港足爭番啖氣。
布力般上場○比一輸畀阿士東維拉，但整場表現唔差，踢法依舊大刀闊斧，「均宜」期待今晚同技術型中場摩頓柏達臣交手，到時即使要硬碰都唔會縮。
