周 一凌晨美洲國家盃B組上演森巴嘉年華，巴西登場對委內瑞拉。被譽為二○一四年世界盃巴西爭標希望嘅兩大超新星尼馬及甘素，將首次代表國家隊征戰大賽，開展「森巴兵團」新時代；而B組另一場巴拉圭對厄瓜多爾，最矚目當數「巴拉圭乳神」拿莉莎會否性感登場，賽前佢豪言如果巴拉圭捧盃就會裸跑，辣興全球球迷！
森巴兵細績錫住委內瑞拉
B組巴西登場迎戰委內瑞拉，巴西實力雖高出對手兩班，但佢哋喺呢項賽事一向慢熱，即使過去兩屆捧盃，於首仗演出皆乏善足陳，兼且領隊文奴文尼斯屬穩陣派，唔會追求大勝，Mic少捧2.35倍入球細。（有線61及201台周一凌晨3時直播）
近三屆首戰全細
翻查巴西過去三屆美洲盃首仗，竟有兩次輸波，包括上屆吞墨西哥兩蛋，前屆僅小勝智利一比○，加上○一年以○比一不敵墨西哥，換言之巴西近三屆首戰都開細。事實上，巴西自從上年由文奴文尼斯執教後，延續上任領隊鄧加穩陣風格，領軍八場比賽僅失兩球，其中七場開細，表現四平八穩但缺乏霸氣，大家唔好期望佢哋今仗會大炒委內瑞拉。
委內瑞拉已唔再係「南美魚腩」，球員已逐步「升呢」，前鋒米古上季喺西甲為基達菲射入七球，中場艾蘭高協助德甲慕遜加柏護級成功。委軍今仗勢必死守，佢哋喺○九年世界盃外圍賽曾試過作客悶和巴西○比○，有迹可尋下，細盤值得追捧。
