「日職空霸」回歸!磐田山葉今日喺主場對名古屋鯨魚,平手都冇着數,因為鯨魚嘅1米94中鋒約舒亞堅尼地已經好番晒,對上兩場為球會同國家隊上陣勁入3球,而且佢要求澳洲唔使佢踢對塞爾維亞嘅熱身賽,專登留力聯賽「入球量產」(入球大量生產),有望帶挈鯨魚贏波。(now633台周六下午1:00直播)
山葉後防失波多
呢場係上季日職神射手正面交鋒嘅大戰,山葉射手前田遼一、鯨魚中鋒約舒亞堅尼地上季各入17球,前田遼一更加係連續兩季日職神射手,而且山葉開季後有3勝4和1負,照道理唔會隨便投降。不過咁,山葉後防唔算硬淨,近7場聯賽得2次保持清白,隨時變成佢哋輸波嘅致命傷。
事實上,近期鯨魚嘅傷兵問題已經好轉,雖然吉川圭司同門將楢崎正剛未傷愈,但中場貝辛奴域、丹尼臣哥度巴同後衞增川隆洋全部好番晒,中場新星金崎夢生亦可能坐後備席待命,中鋒約舒亞堅尼地喺國際賽期前復出,對住福岡黃蜂更先開紀錄帶挈球隊大勝5:2,跟手為澳洲上陣對新西蘭又梅開二度,餓完波勁有態。
賽前約舒亞堅尼地更加自爆,佢冇喺澳洲對塞爾維亞嘅比賽上陣,其實係自己主動要求免役,目的係保留體力喺日職發威,事關佢忍受唔到自己因為受傷影響上陣時間,搞到開季8戰得2個入球,嚟緊要重拾神射手本色「入球量產」,咁有態度梗要撐啦!