美洲金盃C組第二輪賽事美國對巴拿馬。東道主美國一向喺分組賽橫行無忌,自九一年賽事成立開始,呢個「中北美洲海盜」都可以喺首兩輪分組賽搶W,其中近四屆分組賽次輪都淨贏兩球。呢個無敵數據簡直係一條黃金好路,冇理由唔追,Mic少捧1.8倍美國「讓球主勝」。(now 634周日早上8時直播)
美國上仗毫無懸念旗開得勝,贈加拿大兩蛋,最重要係攻擊主將當路雲已經病愈復出並踢足全場,狀態相當唔錯。到底美國今場可唔可以再下一城呢?成數相當高,因為美國以往都習慣於首兩場分組賽搏命搶分,力求盡早奠定出線,預留體力為淘汰賽做準備。
近四屆次輪均贏2:0
自從美洲金盃九一年舉辦以來,美國喺呢十屆賽事首兩場分組賽都贏波,無獨有偶之前四屆分組賽次輪都贏二比○。美國成績之所以咁穩定,主因係佢哋喺中北美洲球壇超晒班,除墨西哥外,其他球隊好難對美國構成威脅,只要肯出真功夫,美國基本上可以求仁得仁,今場淨贏兩粒濕濕碎。
巴拿馬首輪可以贏瓜德羅普,好大程度因為對手上半場已有一人被逐,值得留意係巴拿馬一度領先三球,但最終只係贏三比二,可見呢班波欠缺紀律,以為有優勢就放軟手腳,呢種心態實在唔要得,遇到弱隊或者可以過骨,但今仗對手係強敵美國,巴拿馬軍心散漫,勢難抵擋美軍進襲。
另外,雙方近六次交手,美國於法定時間九十分鐘內取得四勝二和,三場勝仗可以淨贏兩球或以上,「讓球主勝」有保證。