H組另一場賽事由兩支北歐球隊對壘，冰島主場迎戰丹麥。近五次交手丹麥全勝，完全剋死冰島，由於同組兩大出線熱門葡萄牙同挪威今輪正面交鋒，丹麥贏波就有望提升排名，增加出線機會，更加唔會放過冰島，一於捧客勝。（有線64台周日凌晨2時45分直播）
九二年歐國盃冠軍丹麥現時落後榜首挪威三分，同次席葡萄牙同分，但因對賽成績較差暫時排小組第三位，出線形勢處於被動，所以丹麥更加要趁面對冰島等弱隊時盡量搶分。幸好丹麥水準穩定，應贏則贏，除首循環贏過冰島外，亦擊敗另一支弱隊塞浦路斯。
近五次交手全勝
丹麥今次強陣出擊，阿仙奴前鋒賓特拿、阿積士中場基斯甸艾歷臣及史篤城門將蘇連遜都有入選，相信要攞齊三分唔難。
冰島一直屬於外圍賽陪跑分子，從未打入世界盃或歐國盃決賽周，於今次外圍賽四戰一和三負只入兩球，其中兩次主場都輸波，明顯未夠班。老將古莊臣雖有入選，但佢水準已今非昔比，難為球隊帶來突破。
再睇對賽往績，冰島完全被丹麥食住，雙方近五次交手丹麥全勝，當中三次都可淨贏兩球或以上，若嫌客勝1.65倍唔夠好分，可以博埋「讓球客勝」。
