南美勁旅阿根廷作客同尼日利亞拍跳，阿根廷主帥巴迪斯達只派出B隊，目的係畀一眾星級主力休息，同時睇吓有乜滄海遺珠，不過大軍今次試陣味極濃，作客讓波真係信唔過，「讓球主勝」值得一試。
（周四凌晨2時30分開賽）
一線球星全部冇份
睇番阿根廷大軍名單，美斯、泰維斯、阿古路、希古恩、馬斯真蘭奴等主力全部冇份，主帥巴迪斯達召入大批喺歐洲搵食嘅U25球員，擺明想喺當中搵多幾個球員做替補，波圖守將奧達文迪曾經十一次代表國家隊，已經係隊中擁有最多喼帽嘅球員，前線或由賓菲加射手法蘭高查拉擔大旗，大軍默契不足，戰鬥力必定要打折扣。
尼日利亞擁有主場之利，陣容相對完整，中前場有三位英超兵撐住，包括愛華頓箭頭安尼捷比、韋斯咸前鋒域陀奧賓拿同車路士中場約翰米基爾，西布朗射手奧丹維治因為喺Twitter多口不獲徵召，不過球隊三線都算齊腳，絕對有得打。阿根廷名氣大，所以作客都要讓波，但球隊明顯想試陣，爭勝決心一般，今場一於捧主隊
