德甲煞科，最後一輪九場賽事同時於今晚9時30分上演，多蒙特已提前兩輪奪冠，拜仁慕尼黑同利華古遜亦確保歐聯參賽資格，今晚只係次名之爭，全晚比賽焦點，當然落喺禾夫斯堡、慕遜加柏同法蘭克福三隊嘅護級最後衝刺之上。
目前德甲護級形勢，包尾嘅聖保利已經篤定降班，尾二嘅法蘭克福有卅四分，尾三同尾四嘅慕遜加柏同禾夫斯堡同得卅五分，當中只得一隊可以宣布成功護級，一隊要踢護級附加賽，剩低一隊要陪聖保利降班，三隊只差一分，今晚三弱齊齊作客面對冇嘢爭嘅對手，乜都有可能發生。
馬加夫捐車激勵禾堡
雖然話對手冇嘢爭，不過多蒙特煞科日要同主場球迷大事慶祝，漢堡同賀芬咸亦要主場謝幕，未必會放水，三支護級隊未必可以攞到甜頭，尤其法蘭克福近期攻守都差，作客多蒙特仲要非勝不可，相信佢哋成為第二支降班隊伍嘅可能性最高。
至於禾夫斯堡同慕遜加柏，前者有十個得失球差優勢，今仗贏波即護級成功，賽前教頭馬加夫仲提早捐出佢答允護級成功至捐，價值廿五萬歐元嘅名車作慈善用途，志在提升士氣，不過佢哋上仗主場連凱沙羅頓都輸得，今仗出師賀芬咸，客Ｗ熱到得1.9倍唔算值博。
相反慕遜加柏近五場贏咗四場，近三仗全勝兼一球不失，計表現比禾堡更值得留低，黑柴相信佢哋可以擊敗漢堡，起碼可以攞到護級附加賽資格，慕遜加柏客Ｗ有2.3倍比禾堡好分，要捧一隊當然揀慕遜加柏。
