亞冠盃最後一輪分組賽,E組榜首大戰大阪飛腳主場對FC天津,兩隊各有所求,日本兵團飛腳出線資格未穩,必須全取三分才可確保出線,贏波決心毋須懷疑。FC天津則要力保小組首名出線,亦唔會妥協,考慮兩軍擅攻,今場隨時有大激鬥,捧入球大。(now 671周三晚6時直播)
主場4連勝省13粒
大阪飛腳依家只係領先第三位濟州聯一分,如果今場失分,隨時將出線位置拱手相讓。所以最穩陣方法就係擊敗FC天津,不但毋須理會濟州聯對墨爾本勝利嘅賽果,更可首名出線。飛腳有鮮明目標,戰意肯定高,佢哋另一個優勢係主場威力強,包括聯賽及亞冠盃,今季四次主場出擊全勝共入十三球,要摧毀FC天津防線並唔困難。
FC天津已穩奪出線席位,但根據賽制,亞冠盃十六強以一場決勝負,小組首名可佔主場之利相當着數。FC天津如果今場輸波,就只能次名出線,預料一旦FC天津先失波,肯定傾巢反擊,有利製造入球。FC天津攻力不俗,今屆五場分組賽都有波入,可望同飛腳合演入球騷。