皇馬喺歐聯輸波後,又要收拾心情打聯賽,今場主場迎戰中下游球隊薩拉戈薩,度士覺得佢哋會認真應戰,以皇馬嘅攻力,可以贏兩粒以上。 (now 632周日凌晨零時直播)
皇馬喺歐聯對巴塞嘅四強首回合主場輸○比二,下周中作客魯營球場踢次回合,要反勝對手機會渺茫,所以佢哋今場聯賽亦毋須過分留力,反過來仲可能會更認真比賽,希望踢番場好波,重拾鬥志。
皇馬現時落後巴塞八分,要後上奪冠亦難比登天,不過始終聯賽仲有五輪咁多,而且皇馬都要向主場球迷交代,冇理由放軟手腳唔搶分。
薩拉戈薩作客腳軟
皇馬今場未必排出最強陣容,但睇番上輪聯賽作客華倫西亞,皇馬半力出戰結果大勝六比三,前鋒希古恩連中三元,卡卡入兩球,賓施馬都整番一粒,攻力十足。
薩拉戈薩排西甲中下游,下半季靠主場搶分,作客成績奇差,近六場作客僅得一和五負,佢哋上季作客皇馬輸○比六,今次作客相信又會大敗一場。