西班牙「國家打吡4部曲」今晚爆發第二回合，巴塞隆拿會喺華倫西亞嘅米斯泰拿球場同皇家馬德里上演西班牙盃決賽。皇馬上場出陰招對付巴塞，但相信今晚再難得逞，事關皇馬賽前爆發內訌，對住「盃賽專家」哥迪奧拿，梗係捧1.8倍巴塞主W啦！（now632及660台周四凌晨3:30直播）
皇馬上場狂出陰招逼和巴塞，賽後有傳巴塞嘅碧基同布斯基斯，喺球員通道同成場茅到出汁嘅比比發生衝突，好彩最後冇事。事後巴塞教練哥迪奧拿話預計皇馬嚟緊3場都會再用那渣招，叫球員保持冷靜唔好中計。
又難怪哥帥咁冷靜，事關巴塞以往34次入西盃決賽有25次成功捧盃，奪標率高達74%，更恐怖係巴塞自哥帥執教後6次入盃賽決賽都封王。賽前巴塞仲有好消息，上場傷出嘅後防佩奧爾同艾迪安奴都已傷愈練番波，加上中場馬斯真蘭奴刑滿，中後防齊晒腳。
皇馬爆內訌損士氣
皇馬上場對巴塞保住唔輸，有指隊長卡斯拿斯賽後本來想拉大隊向在場球迷致謝，點知C朗等5位球員竟然唔騷佢，之後雙方喺更衣室仲有啲衝突。而且外傳皇馬高層因不滿教練莫連奴戰術保守，計劃季尾踢走佢，兩樣嘢都影響到皇馬士氣，但更弊係莫連奴認為上場踢三防中效果唔錯，今場就算有艾比奧爾停賽，亦計劃將沙治奧拉莫斯移入中路，繼續派比比客串防中，前場用C朗、奧斯爾加賓施馬嘅三叉戟爭取士哥，踢法保守隨時係今場落敗關鍵！
