紐卡素近年一直畀曼聯食住,原來連今季季中先執教紐卡素嘅領隊柏杜,對親曼聯都係冇運行。佢以往執教嘅球隊從未贏過費格遜,即使係球員時代都係畀曼聯食住,連柏杜自己都話好邪門!
今年四十九歲嘅柏杜曾執教韋斯咸同查爾頓,但對親曼聯都未贏過,估唔到佢踢波嗰陣都畀費格遜食住,最經典一次係九○年足總盃決賽,當時柏杜効力嘅水晶宮兩度領先,但最終加時同曼聯打成三比三,重賽以○比一落敗。
柏杜表示:「費格遜係一位好值得尊敬嘅領隊,能夠喺曼聯執教超過二十年係了不起嘅成就,我都同費格遜講過,我教波以來從未贏過曼聯,我希望今仗可以喺佢身上取得首場勝仗。」