今晚瑞典超「雙堡」大戰,哥登堡主場對希爾星堡,老牌球隊哥登堡今季演出令人失望,聯賽開季後兩戰全敗,近日有傳教練莊拿斯奧臣隨時被炒,令軍心更加不穩。相反,希爾星堡兩連勝兼冇失波,形勢高下立見,平手盤要客軍。 (周二凌晨1時開賽)
哥登堡曾十八次奪得瑞典頂級聯賽冠軍,比該國任何一隊都要多,今季出閘脫腳,球會高層同球迷自然接受唔到,有傳會方已準備請前瑞典國家隊領隊拿格碧克接手。以阿King多年睇波經驗,呢種情況已達到無法挽回地步,球隊唯一可以做嘅事,就係立即換帥,一切重新開始,若仍然由莊拿斯奧臣領軍,將繼續冇運行。
希爾星堡開季前率先奪得瑞典超級盃,打響頭炮之後,表現愈來愈好,而且佢哋近五次聯賽同哥登堡交手,取得三勝二和,過去六次作客哥登堡更保持不敗,加上現時狀態及士氣都喺哥登堡之上,平手盤捧希爾星堡,相當穩陣。
另一場瑞典超,奧雷布洛主場對加費萊,奧軍踢法四平八穩,開季後兩戰都係小勝對手一比○,加費萊攻力亦麻麻,最好揀入球細。德乙卡爾斯魯厄主場對奧格斯堡,主隊要護級,客軍要爭直接升班,雙方搶分意欲強,捧入球大。