每逢季尾,意甲默契波都愈唱愈熱,雖然冇開盤嘅意甲賽事,最終都唔一定和波收場,但上星期切塞納打少3件,到最後居然都可以連追兩球逼和巴勒莫,真係鬼到出面,難怪足智彩本周只係為牽涉前8名嘅賽事開盤。
喺未開盤之前,筆者一度以為卡坦尼亞今晚主場對拉素場波會唔開盤,事關歐洲平均賠率只得2.36倍,或者係因為有直播,先令場波重見天日,不過足智彩和波有2.5倍相對偏冷,又開埋讓球盤,點睇都唔似走盤蝕皮費,還記得世盃墨西哥對烏拉圭一戰,又有類似格局,結果都分到勝負。
卡坦尼亞護級壓力唔大
其實呢場波又唔係冇嘢好爭,特別係作客嘅拉素,仍然要搶分保住第4,爭取來屆歐聯參賽資格,完全唔似出嚟行行企企,雖然近3場客戰全部輸波,但對手都係硬嘢,今仗出戰護級壓力唔算太大嘅卡坦尼亞,平手盤值得秤先。(now633及660台周日晚9:00直播)
Battle精選
足球重心 拉素(平手盤)
睇飛搵食
FC達拉斯(平手)
波特蘭伐木者3日前新主場開幕,當日迎戰芝加哥火燄大鑼大鼓爭開齋,仲惡到首度讓波,結果如願以償大勝4:2,不過聽朝主場迎戰排名更低嘅FC達拉斯變番平手盤,似乎係時候打回原形。