荷甲班霸燕豪芬今晚喺歐霸8強次回合主場出擊,迎戰葡超「阿二」賓菲加。燕豪芬首回合大敗後出線機會渺茫,今仗隨時放棄,寧留力專心聯賽爭標,預料賓菲加可全身而退,要1.53倍「讓球客勝」!(有線64及203周五凌晨3:05直播)
寧留力爭荷甲
首回合燕豪芬作客慘敗1:4收場,雖然全隊上下表明要喺今仗反勝晉級,但平心而論,燕豪芬要贏攻守實力都較自己平均嘅賓菲加3:0以上,惟盼奇迹出現。最慘係燕豪芬有聯賽後顧之憂,佢哋依家落後「一哥」川迪2分排次席,又僅領先第3位嘅阿積士1分,為咗爭荷甲冠軍又好,又或者力保下屆歐聯席位都好,餘下4輪聯賽根本冇失分空間,預計教練魯頓或會有所留力,加上中場安格拿同守將派達斯停賽,進一步令實力大打折扣。
由於波圖經已奪得葡超冠軍,令已攞到下屆歐聯入場券嘅賓菲加可放棄聯賽,專心一意爭奪歐霸盃錦標,戰意上已勝主隊一籌,更重要係佢哋今屆歐霸盃錄得4勝1和不敗佳績,今場就算作客出戰亦冇有怕,受讓一球更值捧場。